CLICK HERE FOR THOUSANDS OF FREE BLOGGER TEMPLATES »

Wednesday, June 25, 2008

حـالة تعب .. و مزاج سوداوي




مرة كنت باتكلم مع حد دخل البلوج دة .. و قال انه هيبقى بلوج خفيف و ساخر و انا في نفسي ، قلت إني هحاول يكون كدة


على فكرة انا كذبت !! صعب البلوج دة يبقى خفيف و ساخر مع واحدة زيي ، سمر كان ممكن تعمل بلوج خفيف و ساخر لوحدها ، لكن لمستي غالباً هتبقى لمسة لونها بنفسجي غامق أو ربما كحلي يميل الأسود بشكل ما ، مش عاوزة أقول لمسة سوداء


الساعة دلوقتي واحدة و نصف صباحاً انا مش جاي لي نوم و حاسة اني لو ماكتبتش الكلام دة ممكن ماعرفش انام خالص ، كان ممكن أكتبه في مذكراتي بشكل ما ، بس انا مش طايقة امسك قلم ، و في نفس الوقت قلت فرصة أجرب البلوج في الفضفضة .


الكلام اللي بيتكتب هنا بيتكتب عشان لازم يطلع برة ، مش مهم أي حد يقراه و انا مش خجلة على صورتي قدام اي حد في العالم ، لأني زهقت من المثالية بقى ، مش عارفة ايه التماثيل اللي الناس بينحتوها دي و بيجبرونا اننا نبقى شبهها ، حاجة تخنق !!


زهقت من كلمة المفروض .. المفروض تقولي .. المفروض تعملي.. حرام بقى انا انسانة و الله العظيم انسانة .. ليا مشاعر و ليا احاسيس مش ماشية بزراير


و مش مستنية من أي حد انه ينصب لي محكمة بعد الكلام دة لأنه مش كلام مثالي ، مش كلام نظري زي اللي بيتكتب في اغلب المدونات ، انا فعلا ًعاوزة ابقى انسانة طبيعية بعيش بشكل طبيعي ، من حقي اتنرفز و اغلط و ابقى مذنبة و مش عاوزة حد يلومني و يقول يتقصدي و ماتقصديش .. .


بامر بحالة من التعب ، حاسة بتعب و ارهاق شديدين جداً جداً ، بالرغم من اني حالياً مش بشتغل مثلاً و لا بعمل اي حاجة ، و لا بعمل اي حاجة خالص فعلاً ، كل اللي بعمله اني اقعد اقرأ او اكتب و بس .. حاسة ان حياتي توقفت ، خلاص فاضل لي بالظبط 24 يوم و يبقى عندي 28 سنة


28 سنة .. يااااااه .. عملت انا ايه بقى في التمانية و عشرين سنة دول ؟؟


و الله ماعرف !!


حاسة بوحدة شديدة جداً .. و زهقت من كذب الناس عليا ، زهقت من الكذبات الكبيرة اللي بيحصل عليها مساومة غصب عني بعد كدة عشان اقبل الحقيقة ، زهقت من اللعب بتاع النصب و اللف و الدوران ، زهقت من ان الكذب و الخبث و انعدام الضمير دخلوا في كل حاجة في حياتنا ، حتى علاقاتنا الغير معقدة المفروض انها علاقات انسانية بسيطة قائمة على الصدق و الصراحة و البساطة و بتحقق لنا نوع من الراحة و الامان بقت علاقات معقدة ، فعلاً حاجة تقرف حاجة تقرف بجد ..


حتى أحلامي اللي كنت عاوزاها طارت ، بقى مفروض عليا أحلام تانية لازم احلمها عشان اعرف اعيش ، قد ايه الناس سخيفة و قد ايه الناس كذابين ، قد ايه بقينا مجردين من الضمير و الأخلاق يا الله قد ايه الناس بقوا متعبين و تعبانين ، و من القهر بقوا يقهروا بعض


ايه يعني يضيع من عمري وقت ؟؟ ايه يعني ؟؟ و لا حاجة !! المهم ان في حد اخد اللي هو عاوزه و عادة الحد دة - دايما ًمش عادة - بيبقى مش انا ..!!


زهقت من الضغط على مشاعري.. زهقت من المساومة .. ايه القرف دة !!


انا بقيت حقودة جداً جداً .. اول مرة اكتشف الحكاية دي فيا النهاردة .. انا بقيت حقودة ..!!


و بقى عندي قلب أسود .. أسود جداً .. لدرجة اني انتبهت النهاردة اني باحقد على كل البنات اللي تحققت احلامهم و لم تكن احداهن لها نصف ما أملك !!


لدرجة اني بقيت باقول ان العيب فيا ، المفروض اكون اقل خلقاً و ديناً من هذا كله .. !! كان المفروض اني ابقى اي كلام .. لا ضمير و لا اخلاق و لا اي حاجة و البس طاقية دة لدة و اعيش حياتي ..


انا مريضة .. مريضة من جوايا حاسة بالعجز الشديد اني مش قادرة حتى اعيش في استقرار .. ايه الناس اللي كان بتعدي تاخد من وقتي و حياتي و تمشي دي .. يا ساتر قد ايه الطمع وحش و قد ايه همة زبالة


زهقت من ان الخيانة هي اسهل حاجة لما الواحد يتأكد ان مفيش حد شايفه و ان مفيش حد يقدر يكتشفها ، زهقت من ان الناس تايهين مش عارفين همة عايزين ايه و بيتعبوا أمثالي معاهم ..!


قلبي واجعني جداً .. حتى الحاجة الوحيدة اللي محتاجاها و باخدها بصدق .. لقيت انها التعقيد بدا يدخلها .. و اني حتى لو عاوزاها مش هاخدها كاملة .. دة انا لازم اقبل و احارب و ابذل مجهود تاريخي كبير جداً أكبر من المجهود اللي اتعمل في حصان طروادة عشان اعيش بقدر قليل من الشرف و الكرامة دة لو الوضع اللي بعد كدة ضمن لي الكرامة اصلاً .. المجتمع بتاعنا مجتمع زفت و احنا بتحرم الحلال و نحلل الحرام و بقت حكايتنا حكاية


عاوزة ابعد عن كل حاجة و افضل في اوضتي اصلي و اقرأ قرآن جايز ربنا يتوب عليا و يطهر قلبي الاسود اللي بقى تقيل جدا من كتر الذنوب و من كتر الناس الزبالة اللي بتعدي عليه و ترمي فيه قمامتهم و يطلعوا منه نضاف


نفسي حد يضحي عشاني .. عشان انا شيماء .. مش عشان هياخد حاجة من ورايا .. ايه دة.. انا تعبت و الله.. الناس دي لو استثمرت ذكاءها في اي حاجة غير انهم يدمروني بالشكل دة .. كانوا بقى مليارديرات و اساميهم في فوربس كل يوم !!


على فكرة .. بمناسبة التوبة و الكلام دة .. في مشروع كويس.. اسمه 100 يوم قبل رمضان



اللي عاوز يتابع و يبقى له في نصيب باذن الله يبقى يزور الموضوع اللي في اللينك
انا حاسة اني احسن كتير دلوقتي شكرا
للبروزاك


..............................


اللي مش عاجبه البوست مايعلقش .. و اللي عجبه البوست مايعلقش.. ماشي؟؟


و لو حد علق .. مش عاوزة كلام نظري من اللي بيتقال في ابواب حل المشاكل اللي في الجرايد ، ماشي ؟؟


و مش عاوزة الكلام المثالي .. لأني انا اللي باكتبه و انا اللي علمته لأي حد بيكتبه ، ماشي ؟؟


........................


شيماء



1 comments:

Anonymous said...

معلش يا شيمو محدش بيتعلم بالساهل بس بصي للناحيه التانيه اكيد فيه ناس فهمتك ووقفت جمبك انا عندي 20 وحاسس ان عندي 40 حصل فيا كتير وكنت حاسس ان اللي كتبتيه كان عني بس مش حقد خالص انا تعبت بجد تعبت والله حتي الوحيد اللي كان بيفهمني مسافر انا اسف رغيت بس انفجرت خلاص