CLICK HERE FOR THOUSANDS OF FREE BLOGGER TEMPLATES »

Friday, June 27, 2008

أغنية .. و واحد هامبرجر

إزيكم ؟؟
عارفين ..
أحلى حاجة في الدنيا إيه ؟؟
مج قهوة سوداء فيه معلقة سكر واحدة ، الكمبيوتر و البلوج ، و Dido
أغنية Life For Rent
عندي صداع مش عاوز يختفي ، أعتقد إن ارتفاع ضغط الدم عندي سبب رئيسي فيه و مع ذلك باشرب قهوة ، ساعات كتير باخاف اموت بالسكتة الدماغية نتيجة ارتفاع ضغط الدم عندي
حاسة ان الدم بيفور في رأسي و حاسة بسرعة تدفقه فعلاً في دماغي
غير اني مش قادرة افتح عيوني مش بنام و عندي أرق فظيع و مش عاوزة آخد أي حاجة تخليني أنام مش عاوزة أبقى مفرطة في استخدام العقاقير أو الأدوية لأن كدة بقى مش كويس
اغنية حياة للايجار .. اللي انا كنت لسة بتكلم عنها هنا
الأغنية دي شبهي اوي اوي بالرغم من اني باميل للموسيقى أكتر من الأغاني لأن الموسيقى بتمنح ما لا يمنحه غيرها ألا و هو ، حرية الإحساس ، الموسيقى ممكن تحس بيها بأي
شكل يعجبك ، لكن الأغنية الكلام بيبوظها .. ساعات كتير بيبقى اللحن راقص جدا و الأغنية مليانة نكد في نكد
بس الموسيقى مش هتلاقي فيها الكلام دة ..
لكن الأغنية دي .. كلامها كله كله شبهي .. شعور بأنك من غير بيت .. أحلام بتتخلى عنها و بتبقى مش فاكر اتخليت عنها ليه ؟؟ و بتسأل نفسك ، يا ترى الحلم دة حصل له ايه ؟؟
و تقول انك كان نفسك تعيش بشكل أبسط و تفكر بشكل أبسط ، و مش حاسس بوجود الوطن جواك .. بس هتعمل ايه ؟؟

بالنسبة بقى لحاجة تانية
...

امبارح بالليل .. جالي مزاج آكل برجر .. و بالتحديد هامبرجر
وقفت في المطبخ و قضيت وقت طويل جداً عشان أعمل ساندوتش
ساعات لما بابقى متضايقة او مش مرتاحة باقف في المطبخ مدة طويلة أوي أوي ..
شوفوا الساندوتش بتاعي كميل إزاي


أول امبارح وقفت في المطبخ 6 ساعات باعمل بيتزا
عشان ابطل تفكير
اول ما احس اني ممكن أفكر
باكافح التفكير بالمطبخ على طول
مش عارفة ايه لزمة كل الكلام دة
بس انا حبيت ارغي في اي حاجة .. و رغيت الحمدلله
.............
سلام ....
..............
شيماء

1 comments:

Ahmed said...

" امبارح بالليل .. جالي مزاج آكل برجر .. و بالتحديد هامبرجر "

مش عارف ليه افتكرت جيمس بوند لما بيقول اسمه لحد .... الحوار بيبقى كده

hi ... i'm Zorbi7a .. & u ?
Bond ... James Bond
برجر .... همبرجر

Nice Topic
& nice Comment 2 ;)