CLICK HERE FOR THOUSANDS OF FREE BLOGGER TEMPLATES »

Sunday, August 31, 2008

اصوات كتير غير معتادة...زى صوت الاطفال فى البيت..اولاد اختى...بحس ببهجة لحظية اول مااسمع صوتهم
وارجع تانى للحالة القديمة من غير اى وقت...
زى صوت الجوامع اللى بتعتبر رمضان...شهر المايكات..وان اللى يعلى صوته اكتر يبقي احسن
وصوت الكنيسة اللى بتتعمد تعمل التراتيل بتاعتها وقت الاذان وتكملها فى الاقامة
اصوات كتير مش معتادة...واحساسها مابيفرقش...زى صوت بعض النغمات المخصصة لبعض الناس...اللى مابيتصلوش
يمكن بتعمد ارمى الموبايل فى حتة ماقدرش اسمعه...ولما بيفصل شحن مابشحنوش
فى بعض الحاجات بتعملك احساس...بتستغربه....اد ايه كان بيأثر فيك الفعل ده ودلوقتى مابيلفتش انتباهك حتى
رسايل تهنئة...رسايل نصية معروفة...بتديلك احساس بالروتينية اكتر من الصدق...بكتفي بالرد عليها بأبتسامة..وكلمة وانت طيب
وبرغم حالة اللامبالاة....لسة فى جزء مستنى حاجة...بيزعل لما ماتحصلش....مش عارفة ده نوع من الامل فى الحياة...ولا على سبيل مستنى غلطة للحياة
::::::
امبارح خرجت....من فترة طويلة...ومن فترة طويلة برده مكنتش عايزة اخرج...الشوارع منوّرة اكتر...وزحمة اكتر بكتير....وكل حاجة غالية شوية
الشارع مكان جميل جدا....مناسب لكل حد..مناسب ليا فى اوقات كتير...خاصة الاوقات اللى مابقدرش انزل فيها...بعد نص الليل
فى اماكن غيرت جلدها تماما...بالنسبة لذاكرتى...كل اللى حصل فيها وقع تماما واختفى....مابقيتش بتفكرنى غير بشوية احداث ممكن حتى ماتكونش حصلت فى الحقيقة...اغلبها خيال...وامنيات من وقت ماضي
فى وقت من الاوقات اعتبرت ان الذكرى مش سبيلي الوحيد...للأستمتاع بمكان....ونفس الفكرة بقت مع الوقت سبب عدم استمتاعى بأى مكان
رغم انها بتديلك فرصة كبيرة انك تعمل حياة جديدة...ولحظات من حقك انت بس...بغض النظر عن انت من امتى؟؟وانت فى اى اتجاه
::::::
بعض الرسايل النصية تانى....فكرتنى بتوقعاتى القديمة....واكدتلى بعض قرارات...سريعة...اخدتها من حوالى سنتين على الاقل
اتعلمت ماردش غير على اللى بيسأل....وماستناش رد..علشان عمرى ماهبدأ بالسؤال
مهما كانت الحاجة لما بتتعب علشان توصلها بتعملك احساس جميل....لو اتقدمتلك فى صورة هدية بتبقي اجمل بكتير
...كفاية فكرة المفاجأة
اتفقت مع صحبتى نحاول يكون رمضان مختلف....يمكن فعلا يكون مختلف....واختلف معاه...ويمكن فى اخره يجي عيد ماضطرش انام فيه للمغرب علشان اليوم يعدى بسرعة
وجهزت من دلوقتى بعض العبارات اللى هقولها للبنات لما يقابلونى ويسألونى فينك ياوحشة...للأسف ماتعودتش اهاجم زيهم...ولفترة قريبة كانت بتأثر فيا الكلمة وتزعلنى من نفسي وابدأ اسأل
..واكتشف ان انا مش وحشة ولا حاجة
دى مجرد لزمة اجتماعية...لزوم الضحك على الدقون
:::::::
فى ناس كتير علقت الفوانيس بتاعتها...ودى حاجة جميلة....وناس من دلوقتى بتشتري هدوم العيد
اللى برده غير جلده تماما....وماافتكرش من كل الاعياد اللى عشتها غير كام لقطة من سنين متفاوتة...مع ناس مش فاكرة ملامحها ولا اساميها....
غالبا هنقضي العيد ده مع بعض.....وغالبا مش هنكون مع بعض فعلا..غير بعد المغرب
هحاول ارتب قبلها ليلة بيات علشان نحضر اليوم من اوله والا هضطر انام للمغرب فعلا تانى...
يمكن دى احسن حاجة فى الموضوع.....اخر عيد قضيناه سوا كان سنة 2005...ومكنش معانا اى وجوه جديدة من الجيل التالت
وده برده بيدى تميز للموضوع...ممكن نتصور...ونعمل ذكرى ظريفة..الله اعلم هنكون فين بعد كده
..كل سنة وانتو طيبين...ورمضان كريم..

0 comments: