CLICK HERE FOR THOUSANDS OF FREE BLOGGER TEMPLATES »

Tuesday, September 30, 2008

عيـــــدكم مبــــارك


كل سنة و انتم طيبين
الحمدلله الذي رزقنا رمضان
الحمدلله الذي أعاننا على الصيام و القيام
عسانا من الفائزين بإذن الله هذا العام
هدى الله المفرطين في رمضان .. هؤلاء الذين حرموا نعمة الطاعة في الشهر الكريم لكثرة ذنوبهم .. فعموا عن الحق و الرشاد ..
أسأل الله أن يهديهم و أن يعيد رمضان علينا جميعاً اعواماً عديدة
و أن يرزقنا القرب في كل مرة أكثر
الطبق اللي فوق دة من منزلنا العامر
النهاردة أول ايام العيد بالكويت هنا
و الله لو ينفع كنت بعت لكل واحد بيعدي هنا طبق
انا كنت مبسوطة جدا رمضان دة
دة اكتر رمضان انبسطت فيه لغاية دلوقتي
حسيت بروح رمضان و بجماله جدا السنة دي
حاجات كتير اوي اتغيرت جوايا
الحمدلله على نعمة رمضان الحمدلله الحمدلله الحمدلله
فعلاً الغسيل النفسي و الروحي اللي بيحصل في رمضان مش ممكن يحصل إلا في رمضان
و الله ما أجله من نعمة أي ما أعظمه من نعمة :)
أسأل الله الثبات هذا العام و حتى رمضان القادم

_______

رسائل خاصة
سمر : كل سنة و انتي طيبة يا سمر يا حبيبتي
يوسف : كل سنة و انت طيب يا يوسف .. و ان شاء الله السنة الجاية تكون كل حاجة بقت أحلى و دة وعد :)
لميــاء : كل سنة و انتي طيبة يا لمياء .. ربنا يعينك على دوام الطاعة .
خلود : كل سنة و انتي طيبة يا حبيبتي .. ربنا يكرمك و يرزقك كل خير
ياسمين : كل سنة و انتي بكل خير يا ياسمين و ان شاء الله السنة الجاية تكونوا بقيتوا 3 .. مش انتي و احمد بس.
أحمد هندام : كل سنة و انت طيب يا رفيق الدراسة و الكفاح
أحمد عيسى : كل سنة و انت طيب .. و عسى ان يستجاب دعاؤك هذا العام



Thursday, September 25, 2008

غنوا لحبيبي و رددوا له التهاني :)


صباح الورد يا جماعة ..


إزيكم عاملين ايه ..؟؟


معلش انا في رمضان دة كنت بعيدة شوية في محاولة مني للوصول إلى نفسي لأكون كما كنت منذ سنتين ..


الحاجة الجميلة اني و لله الحمد استطعت ان اعود الى نفسي ..الحمدلله فعلاً


رجعت زي ما كنت .. رجعت بنفس درجة الصفاء و النقاء .. و ربنا يثبتني ان شاء الله


النهاردة .. ذكرى حدث مهم جداً..


يوم غير مجرى حياتي ..


زي النهاردة من 21 سنة .. كنت لسة في تانية ابتدائي


بابا جه أخدني من المدرسة و أخد اختي اللي كانت لسة في رياض الاطفال


و ودانا البيت .. و احنا في الطريق للبيت بابا قالنا إن ماما في المستشفى هتجيب النونو النهاردة


طبعاً انا و اختي كنا لسة في السيارة .. فرحنا جداااا جداااااا و قعدنا نقول : هييييييه هييييييييييه ...

هههههههههههه أطفال بقى


أول ما رجعنا البيت اتصلوا ببابا من المستشفى و قالوا له ان ماما جابت ولد ..


انا و اسماء كنا عاوزين نسمي لؤي أو حسام مع اننا كنا صغيرين جداً .. بس كان نفسنا يبقى اسمه كدة


لكن امي اول ما جابته في المستشفى اختارت الأفضل.. اختارت أحمد

أحمد أخويا اللي زي النهاردة كان لسة مولود

دلوقتي بقى ماشاء الله في كلية الهندسة و خلاص قرب يتخرج

أحمد يا حبيبي كل سنة و انت طيب

أحمد من الرجال القلائل في هذا الزمان ماشاء الله و بارك الله فيه

عرفت ناس كتير جداً أكبر منه بكتير اوي ..لكن محدش فيهم وصل لأخلاقه و لا طباعه الجميلة

و لا قدرته على الوفاء بما يقول حتى لو على رقبته :)

و دي من الحاجات اللي بحبها فيه .. مش ممكن يوعد و يخلف .. مش ممكن يتكلم و يكذب .. و مش ممكن تأتمنه و يخون

ماشاء الله .. فعلاً احمد دلوقتي قرة عين لنا كلنا في الزمن دة .. اللي اتملى أندال و كذابين و صفايح زبالة

في وسط كل الناس دول .. بتلاقي ناس زي احمد .. لسة في اول الطريق و لسة ثابتين على قيمهم مهما حصل و مهما اتغير

ربنا يحفظك يا أحمد .. و تفضل كدة على طول ..

كل سنة و انت طيب يا حبيبي ..





Sunday, September 21, 2008

بحب الجيتارات وبحب الشتا
الايام دى من اكتر ايام ليها شبه فى ذاكرتى
وبحب الهوا
والبرد
والليل
شوية وحشونى...حظى معاهم وحش للأسف..وبرغم الفترة القصيرة كان فى ذكريات جميلة فعلا وغنية
ايميرالد العزيزة...بجد وحشتيني..فاكرة اوى لما اتصلتى بيا تقوليلي على المسج الغلط...المعتاد
فاكرة كل الخطط المشتركة...والبلاوى السودة
:D
شوشو ...يارب تكونى كويسة ...ويارب تكونى سعيدة برمضان..وتقضي عيد جميل اوى ومبهج
الدراسة بدأت...ولسة هبعد اكتر..ودى اوحش حاجة فى الموضوع
يارب نتقابل على خير

Monday, September 15, 2008

تباشير الشهر

النشيد دة جميل جداً
تباشير الشهر .. للقاريء قهد الكندري .. فهد الكندري من أئمة المسجد الكبير في الكويت
و صوته رائع رائع رائع .. و فعلاً الصلاة خلفه او خلف مشاري راشد لها طعم مختلف تماماً أصواتهم مليئة بالخشوع
النشيد دة بيذيعه تلفزيون الوطن بعد آذان المغرب مباشرة ..
النشيد رائع .. أعتقد ان اغلب الناس عارفاه في رمضان دة
و الفيديو كليب اللي اتعمل للنشيد جميل جداً..
حاجة فعلاً مناسبة لروح شهر رمضان و لجلاله و عظمته
القصيدة جميلة باعتبار اني بحب الشعر جداً
و صوت القاريء ممتاز جدا



Sunday, September 14, 2008



احنا كبرنا..تقريبا الوقت ده عدى فعلا....من 5 سنين اتعرفت على شوية زمايل فى موقف مكنش مفروض اكون فيه....مش بتاعى يعنى
وحصلت الحصايل...واللى باقى من الشلة دى..الناس اللى كانو مش مفروض يكونو مع بعض
المهم ان طول الفترة دى..بعتبر ان احنا مش صحاب ومش زمايل...مبدأتش احس ان احنا بقالنا 5 سنين عارفين بعض غير لما بدأنا نتفرق
الحاجة التانية اللى بستغربلها اوى...مدة العلاقة....قليلين اوى اللى اعرفهم من فترة طويلة....كل حد بياخد نصيبه من التجربة معايا وبيختفى بدرى بدرى...
مش عايزة اقول كانت ايام جميلة...بس دلوقتى الايام غريبة بالمقارنة بيها
كنا لسة عيال شوية وبنضحك بهبل...وكنا جامدين ومتشردين...كان عندنا طاقة مش باقى منها حاجة دلوقتى...ومش عارفة ايه السبب فى كده
مش عارفة حكمنا على الناس بيكون صحيح بصورة مطلقة ولا نسبي...ناس منهم..معروف عنهم انهم عيال اى كلام...بس مافيش ولا موقف حصل معايا يدل على كده
بالعكس...كانو بجد جدعان
مش عارفة بقى هما اى كلام وجدعان بسبب الظروف ولا بسبب صفة شخصية
بحس بفقدان للمعانى....وبعدم قيمة اى حاجة....الدنيا بتنتهى بسرعة وعلى غفلة.مابنلحقش نشبع منها...وساعات المعنى بيضيع علشان مابيكونش موجود من الاول...واحنا اللى اتخيلنا وجوده
كنت بتخيل ان الهدف من العلاقات وان احنا نقضي وقت مع بعض....هو البقاء...الاستمرار فى كده...او التمهيد للأستمرار
دلوقتى بس اتعلمت اقضي الوقت علشان استمتع بيه..فى لحظتها..علشان مهما كانو الخمس سنين اللى بنعيشهم طوال او قصيرين..هيعدو
واحتمال مانلحقش نودعهم....يتخطفو يعنى
ساعات بشك ان اى معنى حلو...واى احساس...مخلوق علشان يعذبنا فى النهاية...اى علاقة كويسة فى نهايتها بتبقي مشكلة كبيرة
واى وقت جميل فى نهايته بيقتل جمال الوقت اللى جى
الله اعلم بجد
انا حتى ماكتبتش ذكرى لأى حد فيهم...ومعنديش ولا صورة...حتى اليوم اللى تعمدت اخد فيه الاوتوجراف بتاعى...ماقدرناش نتجمع
بعد كام سنة ..هنفتكر اللى فات ده..على انه حلم...صور باهتة..فيها وشوش مش واضحة ونبرات صوت منسية...وتخيلات
مى.ايمان.ريهام.سالى.مى.ياسمين.ايمان.سمر.سمر.ان.بهاء.حسام.رضا.سيد.هند.دينا.امنية.سما..دعاء.خلود.سارة.اسامة.احمد.احمد..رشا."مها"
مفضلش منا غير انا وهند وبهاء
وحبة حكايات
وبهاء اتخرج ودخل الجيش..وعلى حد تعبيره"احلامه كلها اتحطمت"...

ـــــــــــــ

كل سنة وانتو طيبين ياجماعة...ويارب حياتكم الجية تكون اجمل...كانت فترة مميزة اللى عرفنا بعض فيها...وعمرها ماهتتنسي

Wednesday, September 3, 2008

عادت عليكم .. يا هلا .. يا هلا فيكم .. يا هلا :)


كل سنة و انتم طيبين ..

رمضان كريم ..

تقبل الله الصالحات من اعمالكم ..

اقرؤوا القرآن في رمضان ..

و أكثروا من الصدقات

استغفروا الله فإنه غفار

ولا تسألوا الخير غيره

أكثروا من الدعاء .. عسى الله أن يرفع عنا ما نجد من ابتلاء

اللهم عليك بالظالمين اللهم عليك بالظالمين اللهم عليك بالظالمين

اللهم أرنا فيهم عجائب قدرتك

اللهم انك تعلم ان ببننا مغلوبين فانتصر

اللهم انك تعلم ان بيننا مغلوبين فانتصر

اللهم انك تعلم ان بيننا مغلوبين فانتصر


يوووووووووووووووووووووووووووووووووووووووووووه


يلعن ابوده الحظ
انا عملت ايه يعنى علشان يحصل كده
:(


Where do we go?
I don't even know
My strange old face
And I'm thinking about ...
..
those days
..
..
..