CLICK HERE FOR THOUSANDS OF FREE BLOGGER TEMPLATES »

Sunday, August 31, 2008

اصوات كتير غير معتادة...زى صوت الاطفال فى البيت..اولاد اختى...بحس ببهجة لحظية اول مااسمع صوتهم
وارجع تانى للحالة القديمة من غير اى وقت...
زى صوت الجوامع اللى بتعتبر رمضان...شهر المايكات..وان اللى يعلى صوته اكتر يبقي احسن
وصوت الكنيسة اللى بتتعمد تعمل التراتيل بتاعتها وقت الاذان وتكملها فى الاقامة
اصوات كتير مش معتادة...واحساسها مابيفرقش...زى صوت بعض النغمات المخصصة لبعض الناس...اللى مابيتصلوش
يمكن بتعمد ارمى الموبايل فى حتة ماقدرش اسمعه...ولما بيفصل شحن مابشحنوش
فى بعض الحاجات بتعملك احساس...بتستغربه....اد ايه كان بيأثر فيك الفعل ده ودلوقتى مابيلفتش انتباهك حتى
رسايل تهنئة...رسايل نصية معروفة...بتديلك احساس بالروتينية اكتر من الصدق...بكتفي بالرد عليها بأبتسامة..وكلمة وانت طيب
وبرغم حالة اللامبالاة....لسة فى جزء مستنى حاجة...بيزعل لما ماتحصلش....مش عارفة ده نوع من الامل فى الحياة...ولا على سبيل مستنى غلطة للحياة
::::::
امبارح خرجت....من فترة طويلة...ومن فترة طويلة برده مكنتش عايزة اخرج...الشوارع منوّرة اكتر...وزحمة اكتر بكتير....وكل حاجة غالية شوية
الشارع مكان جميل جدا....مناسب لكل حد..مناسب ليا فى اوقات كتير...خاصة الاوقات اللى مابقدرش انزل فيها...بعد نص الليل
فى اماكن غيرت جلدها تماما...بالنسبة لذاكرتى...كل اللى حصل فيها وقع تماما واختفى....مابقيتش بتفكرنى غير بشوية احداث ممكن حتى ماتكونش حصلت فى الحقيقة...اغلبها خيال...وامنيات من وقت ماضي
فى وقت من الاوقات اعتبرت ان الذكرى مش سبيلي الوحيد...للأستمتاع بمكان....ونفس الفكرة بقت مع الوقت سبب عدم استمتاعى بأى مكان
رغم انها بتديلك فرصة كبيرة انك تعمل حياة جديدة...ولحظات من حقك انت بس...بغض النظر عن انت من امتى؟؟وانت فى اى اتجاه
::::::
بعض الرسايل النصية تانى....فكرتنى بتوقعاتى القديمة....واكدتلى بعض قرارات...سريعة...اخدتها من حوالى سنتين على الاقل
اتعلمت ماردش غير على اللى بيسأل....وماستناش رد..علشان عمرى ماهبدأ بالسؤال
مهما كانت الحاجة لما بتتعب علشان توصلها بتعملك احساس جميل....لو اتقدمتلك فى صورة هدية بتبقي اجمل بكتير
...كفاية فكرة المفاجأة
اتفقت مع صحبتى نحاول يكون رمضان مختلف....يمكن فعلا يكون مختلف....واختلف معاه...ويمكن فى اخره يجي عيد ماضطرش انام فيه للمغرب علشان اليوم يعدى بسرعة
وجهزت من دلوقتى بعض العبارات اللى هقولها للبنات لما يقابلونى ويسألونى فينك ياوحشة...للأسف ماتعودتش اهاجم زيهم...ولفترة قريبة كانت بتأثر فيا الكلمة وتزعلنى من نفسي وابدأ اسأل
..واكتشف ان انا مش وحشة ولا حاجة
دى مجرد لزمة اجتماعية...لزوم الضحك على الدقون
:::::::
فى ناس كتير علقت الفوانيس بتاعتها...ودى حاجة جميلة....وناس من دلوقتى بتشتري هدوم العيد
اللى برده غير جلده تماما....وماافتكرش من كل الاعياد اللى عشتها غير كام لقطة من سنين متفاوتة...مع ناس مش فاكرة ملامحها ولا اساميها....
غالبا هنقضي العيد ده مع بعض.....وغالبا مش هنكون مع بعض فعلا..غير بعد المغرب
هحاول ارتب قبلها ليلة بيات علشان نحضر اليوم من اوله والا هضطر انام للمغرب فعلا تانى...
يمكن دى احسن حاجة فى الموضوع.....اخر عيد قضيناه سوا كان سنة 2005...ومكنش معانا اى وجوه جديدة من الجيل التالت
وده برده بيدى تميز للموضوع...ممكن نتصور...ونعمل ذكرى ظريفة..الله اعلم هنكون فين بعد كده
..كل سنة وانتو طيبين...ورمضان كريم..

Friday, August 29, 2008

دى اغنية ظريفة اوى

:)اسمعوها بس واصبروا عليها

المغنى اسمه

sam cooke

والاغنية اسمهاonly 16

جربو تشوفو باقى اغانيه على يوتيوب

بس ماتنسوش تقفلو الموسيقي اللى فى الجنب

ــــــــ

video

Wednesday, August 27, 2008

يوم..زحمة شوية

على كيفك ميل...كده واتمختر
ياساقيني الويل.يابو قلب عسل وعيون سكر
:)
مش عارفة ليه جت على بالى الاغنية دى
بتفكرنى بالصيف..
دى اغنية من ايام الهجرة لأيهاب توفيق
ــــــــــــــــــــــــــــــــ
كنت ناوية اكتب بوست فظيع انهاردة...لغات شرقية بقى وفصحى وعيشة
بس انا مابكتبش بالفصحى ابدا وانا مزاجى كويس...علشان كده منشرتوش
ــــــــــــــــــــــــــــــــ
مرسول الحب فين مشيتي وفين غبتى علينا
خايف لتكون نسيتينا وهجرتنا وحالف ماتعود
بأسم المحبة بأسم الاعماق وحر الاشواق
تعالى..تعالى..يامرسول
اغنية تونسي من الفولكلور...اتغنت بكذا توزيع وكلمات
فاكرة اول مرة سمعتها كانت فى السعودية وانا عندى 7 سنين
كان بيغنها واحد على مسرح...رفيع ومنكوش..وبيرقص رقصة غريبة
بس حبيتها
ـــــــــــــــــــــــــــــــــ
الله اعلم بجد ايه اللى مخبياه الحياة
الكلام ده علشانى
الله اعلم فعلا
الله اعلم ايه اللى هيبقي يستاهل وايه مايستاهلش...وايه اللى هيبقي مناسب وايه اللى مش هيكون
كل حاجة بتتغير...حتى الزعل بيتغير...حتى اليأس بيتغير..حتى الامل بيتغير بأمل تانى مختلف
كله بيتغير
كل اللى نقدر نتمناه فعلا....ان التغير مايكونش جاف ومتعب طول الوقت
انا معنديش ثقة فى ثبات
ومش زعلانة
هحاول اعيشها زى ماهى..واقبل التطور من جوة ومن برة
ومش هناديه...ولا همنعه
:)
ـــــــــــــــــــــــــــــــــــــ
I love you my friend
i love you from the depth of my heart
for this moment
ومش مشكلة باقى وقت
..
..
.وعلى فكرة دى مش اغنية
ـــــــــــــــــــــــــــــــــــــــــ
انام بقى
سلام

Tuesday, August 26, 2008

أنا و همة

أحلى حاجة فعلاً.. إنك تشتغل مع ناس بيحبوا شغلهم
لأنهم هيساعدوك تخلص شغلك و تظبطه و يبقى صحيح كمان ..
لأنهم بيحسوا ان النجاح دة حاجة مشتركة لأنك شغلك مرتبط بشغلهم ..
خاصة و إن كانوا همة لهم تاريخ طويل من النجاح المتكرر يعني..
زي أستاذ أسامة .. و أستاذ مارون
شغلي مرتبط بشكل أساسي بيهم
أستاذ أسامة مستشار تكاليف و حسابات
و أستاذ مارون هو المسؤول عن المشتروات
أجمل حاجة في الاتنين
ان كل واحد فيهم متفهم تماماً لطبيعة شغله
غير ان الشغل معاهم متعة حقيقية .. فعلا ًبيحاولوا وقت الضغط يكون الجو هادي..
المجموعة اللي بتشتغل كبيرة .. بس مفيش حد فعلاً ملفت للنظر من كتر الشغل و التفاني أكتر من أسامة و مارون
لأنهم حتى وقت الراحة ممكن يكونوا بيشتغلوا
بالرغم من ان الدوام طويل
يعني حوالي 9 ساعات و نصف
بيحبوا شغلهم و بيحبوا النجاح .. كل المجموعة اللي بتشتغل معاهم بتنجح بيهم و بينجحوا بيها ..
فعلاً الإخلاص في الشغل و الانتماء له بيدي معنى لكل حاجة الواحد بيعملها فيه
كل حاجة ف يالحياة كدة
اهم حاجة الاخلاص و الاحساس بالمسؤولية الناتجة عن الانتماء
و ربنا يوفق الجميع
:)

Monday, August 25, 2008

كان عندى اساسيات كتير اوى..مالهاش اى صلة بالأساسيات بتاعة دلوقتى
وكان عندى اهتمامات كتير اوى...بعيدة جدا ...جدا عن اهتمامات دلوقتى
وحتى كان بيأثر فيا حاجات كتير اوى....مابتأثرش دلوقتى
وفى حاجات كتير ماكنتش بتلفت انتباهى ابدا...بس بتلفت انتباهى دلوقتى
فى حاجات كتير..كنت بعشقها...وحتى مابحبهاش دلوقتى
وناس كتير...كانو حياتى....وماباقوش حتى فى حياتى دلوقتى
وناس كتير جدا...ماتخيلتش ابدا ابدا مكانتهم عندى دلوقتى
واماكن كتير كنت بقرا عنها...وبعدى....وماتأثرتش بده غير دلوقتى
وناس كتير اتعاملت معاها..واتصاحبنا ومشينا...
ومش فاكرة اى حد منهم دلوقتى
وناس تانية عمرى ماهتعامل معاهم تانى..وهفضل طول الوقت فاكراهم...زى دلوقتى
حتى دلوقتى
لسة بتغير..ولسة بتخيل ان انا ماتغيرتش ابدا...اد دلوقتى

وده اكيد مش صح
:)
الاغنية
دى جميلة اوى
اسمعوها دلوقتى
:)

Saturday, August 23, 2008



بعض العبث لا يمكن الاستغناء عنه او استبداله
بعض العبث خلق فقط للعبث بنا
لنعبث بأنفسنا
لنترك المسميات للقادم من الاوقات
بعبث اخر
ولعبث اخر

Friday, August 22, 2008

صلاةٌ .. قبل رمضان


بسم الله الرحمن الرحيم
كل عام و أنتم بخير بمناسبة قرب رمضان .. هذه النعمة العظيمة التي خص الله بها المسلمين في مشارق الأرض و مغاربها
الحمدلله على أن بلغنا رمضان .. و نسأل الله أن يجعله رحمةً في أوله و مغفرة في أوسطه .. و عتق من النار في آخره

كلنا في حاجة إلى مضان ..

كلنا في حاجة إلى التطهر من ذنوب ذاك العام ..
كلنا في حاجة إلى الإحساس بالرحمة التي تنشر نورها في جنبات أرواح المسلمين في هذا الشهر
أحتاج إلى تطهير روحي .. أحتاج إلى توبة نصوحة من كل الذنوب التي مشيت إليها أو ارتكبها لساني أو عقلي أو يدي ..
أحتاج إلى توبة ..
أحتاج إلى النقاء الذي يلفني وقت صلاة العيد بعد رمضان ..
هذا النقاء الذي أفتقده منذ زمن طويل
أرغب في خروج تسبيحات صادقة من صدري المتعب المنهك .
...
و أشتاق إلى المسجد .. و إلى صديقتي فاطمة .. التي لم أعرفها إلا من خلال صلاة القيام بالمسجد..

أرغب في أن أرفع يدي بالدعاء في رمضان .. كما كنت أفعل ..
أرغب في ان أرتل القرآن قبل الفجر ..
أشتاق إلى نفسي كثيراً .. و أفتقدها كثيراً كثيراً..
لقد فقدت شيماء منذ زمن .. و أحسبها ستعود هذا العام ..
لأنها تعرف أنني أحتاجها .. أحتاج إلى قوتها و إيمانها و ثقتها بالله
أحتاج إلى الاستكانة بملامحها الهادئة .. أختاج إلى النوم المريح حين أِشعر أنها عادت إلي بعد هذا الفراق الطويل ..
أرغب في أن يؤمني أبي للصلاة وقت العصر ..
أحتاج إلى رمضان هذا العام كثيراً..
أحتاج إليه .. و أبتغيه .. و أسأل الله أن يوفقني أمته الضعيقة إلى صيامه و قيامه و حسن استغلال الوقت فيه
اللهم أعني على التوبة من كل ذنوبي .. اللهم ارزقني توبة نصوح في رمضان
اللهم ارزقني العافية .. اللهم أتمم علي نعمتي الصحة و الستر
اللهم اغفر لي ضعفي في مواضع كنت يجب أن أكون فيها قوية ..
اللهم اغفر لي التعدي على حدودك .. بضعفي و سوء تفكيري ..
اللهم إنك تعلم أنني لم أعصك إلا ضعفاً و قلة حيلة ..
و لم أعصك لعند أو لمبارزة لك بالمعاصي
يا الله
يا من لا إله إلا هو .
يا رب العالمين .. يا حي يا قيوم .. يا من لا إله إلا هو ..
اللهم بلغنا رمضان و أعنا على صيامه و قيامه ..
كل عام و أنتم بخير ..



Thursday, August 21, 2008



كلنا ماشيين على موجة...وصعب طول الوقت نفضل بحال واحد...حتى لما الحياة بتثبت من برة..نفسيتنا بتتعب...وده فى حد ذاته يعتبر

تغيير
انا مقدرش اعيش من غير الموجة دى...ومش حاجة اختيارية برده
ساعات بيجيلي احساس غريب...ببص على الوقت اللى فات..واقول لنفسي"ايه الحزين فى الموضوع ده؟"ليه كنت زعلانة...انا دلوقتى ممكن اتريق على الحالة اللى كنت فيها...او حتى اتريق على الحياة نفسها
احنا كيميا..حبة عناصر...حبة كميات...وحبة خلل...ومش ناقصه غير حبة اضافة..وحبة اهتمام
ممكن نوصل لنفس النتيجة...بكذا طريق...يعنى مش شرط نقفل دماغنا ونقول هو ده
فى كمان حاجات بسيطة اوى....ممكن حتى مانتخيلش تأثيرها
بتعوض غياب..وبتلغى التأثير السلبي الكبير...لحاجات كبيرة اوى
وانا صغيرة...كان عندى حاجة اساسية جدا بعملها كل يوم...وبكتئب من غيرها
كنت بصحى بالليل كالعادة...واعمل اى حاجة لغاية بداية النهار
فى السعودية كنت بقف فى الشباك...اعمل باى لدوريات الشرطة المعدية...وامثلهم مشهد ان انا فى السجن...وانا ماسكة فى حديد الشباك
بعد كده افتح التليفزيون..واسمع الموسيقي اللى بيحطوها فى القنوات قبل بداية الارسال
فى مصر...كنت بسمع الموسيقي اللى كانو بيحطوها قبل بداية الارسال...اللى كانت دايما بيعملوها على شاشة فيها "معلومات واخبار..."قناة النيل للمعلومات
ولما يخلص من القناة الاولى والتانية ونايل تى في
الساعة 9 تقريبا افتح القناة التالتة:)
القناة الرابعة والخامسة واالباقيين كانو بيحطو اغانى مزيكات عربي....عبد الحليم ومزيكات بتاعة اهل القنال الترااثية
كانت حاجة اساسية اوى عندى..هبلة وبسيطة ومحدش يتخيل انها حاجة
بس بجد كانت بتغير مودى جدا
كنت حافظة المقطوعات بترتيبها...فى بعض المقطوعات دى كانت بتتعاد تانى على البرنامج الاوروبي"فى الراديو.."واخواتى كانو بينامو عليها بالليل واسمعها تانى وانا بذاكر بالليل
فى سنة من السنين...غيروا الاسطوانة
غيروا المزيكات
زعلت جدا...كنت تقريبا فى المرحلة الاعدادية اايامها... حاولت انسجم مع المزيكا الجديدة وامارس هوايتى الصباحية
بس للأسف....
تقريبا من يوميها وانا مبطلة كده....الا فى اوقات معينة..برامج معينة كنت بحب اتابعها علشان اسمع تتر النهاية او البداية...
زى موسيقي يانى اللى بيحطوها على نايل تي في الصبح...
الفترة دى كانت بسيطة اوى فى حياتى...كنت بروح المدرسة احكى لصحابي على المزيكا!!طبعا كانو بيتريقو عليا
حاولت الاقى هواية شبيهة..وهى اكتشاف محطات راديو جديدة
كنت بوجه الاريال توجيه عشوائي...وامشي المؤشر بالراحة جدا...
عندى تسجيلات اغانى هندى وايرانى وتركى...جميلة اوى اوى...بس مش فاهمة منها حاجة وحتى التسجيل مش واضح
بعد فترة كمان ضاع
كنت بحس بأكتشاف..رغم انه مش اكتشاف فعلى...بس كان بيساعدنى اكتشف حاجات جديدة فيا...ومناطق جديدة بتبسطنى جدا
اللى خلانى احكى على الموقف ده...اولا ان انالقيت مقطوعة من اللى كانو بيشتغلوا فى البرنامج الصباحى ده
تانى حاجة...علشان افتكرت حاجة اد ايه بسيطة..واد ايه كانت ملهمة وفعالة فى يومى
مهما كانت الحاجة اللى بنعملها بحب...بسيطة...وصغيرة
تأثيرها كبير اوى اوى
فكرة جميلة ان احنا نحاول نرجع لمكان قريب من قلبنا..كل فترة..او نكلم حد غالى اوى ..اختفي
او نمارس هواية عتيقة وغريبة...زى تجميع الزلط مثلا...
او تخرج تتمشي فى يوم..من غير هدف...من غير اتجاه...بس علشان تتابع وتكتشف ركن جديد ممكن يبسطك
:)بس فى الحالة دى ماتنسوش الصور
دى المقطوعة اللى لقيتها...حطيتها ..واتمنى تعجبكو فعلا
ـــــــــــــــــــ
شوشو اتمنى الحركات الجديدة تعجبك:))
MOFA2GA

Tuesday, August 19, 2008


بكره احلامى.لما ماتكونش فى صفى..لما تيجي بس علشان تفكرنى بحاجة تعبت علشان انساها..وتعبت علشان ابنى الصورة الجديدة
بكره اللون الاخضر...اد مابحبه...بكرهه لو فكرنى بالمكان القديم...وريحة الهوا..والحال القديم....
بكره الى ماقدرش عليه...وبكره جسمى...لو هيتحايل عليا...ويرجع كل حاجة على صورة حلم
وبكره الحياة لما بكتشفها...على حقيقتها الباردة...وانها اد ايه حقيقية...واد ايه موجودة...اول ماصحى من النوم...بعد حلم بتمنى يطول...وبتمنى مايجيش تانى ابدا





نفسي مااحلمش تانى....ونفسي لو مش هحلم..مانمش




Saturday, August 16, 2008

happy new bard

كل مااعصر قلبي....بعذر
كل حد ادالى قلبه
واحتملنى..واحتما..بي
الكلام ده مش بتاعى..قريته مرة فى الدستور..وعجبتنى الجملة
ــــــــــ
اتمنى..المعنى..يتحقق كمان
وتتساوى قيم المحصلات..كالعادة
وبعد كل مرة عصر
يحصل انتفاضة
او استعادة
لحالة الصفر..المتعادل

Thursday, August 14, 2008




ايه رأيكو فى خصلة الشعر البمبي؟

دى كان مفروض تبقي بيج


الزهق بيطلع اكتر من كده

Tuesday, August 12, 2008

مبحبش اسيّح للناس...رغم ان التسييح فى اوقات كتير يعتبر احسن رد فعل...زى ضربة القلم كده لما تطرقع على خد حد..بيبقي احساس ظريف للطرفين
بس غالبا بنيجي فى وقت اخير رغم محاولتنا الكبيرة للتستر على المتسيّح له...ان احنا بنسيحله فعلا...بس المشكلة ساعتها هتبقي فى ردود افعال الناس اللى هيشوفو ان الريأكشن بتاعك مش مناسب للموقف...واللى مع الوقت هيتحطو فى موقف هتضطر ساعتها تجيبلهم القديم والجديد
بكره اوى الستاير...وبكره الولاد الى بيحبو الستاير برده....وناس كتيربتكره السجاير والستاير...وبتكتب شعر...وبتعمل مدونات رقييييقة مرهفة الاحاسيس
:هقلكم مثال على كلامى
واحد دخلى الماسنجر من كام يوم....كان عامل اوفلاين......هو اكيد مش اى واحد....بلوجر ناشط ورايتر كمان....ولما قرا العبارة اللى كنت كاتباها قدام اسمى اتفضل عليا وكلمنى
ها مالك بقى ياستى_
المهم وبعد حبة كلام وصلنا لمرحلة ان احنا لازم نتقابل.....بناء على تحليله الفذ
تعاليلي القاهرة يوم وانا هوريكي اللى عمرك ماشفتيه_
ايه هتضربنى؟؟_
!!!وده ينفع برده...لا هدلعك_
هيدلعنى ياجماعة
المهم فضل فى محاولاته انه يدلعنى...وانه يقنعنى ان انا محتاجة احب واتحب
ياسلااااام...الدنيا مليانة حب والله وانا محتاجة اتحب
"وفى الاخر اتم حديثه ان دلعه مش اى دلع...".مفروض نقدمله ورقه فى وكالة اعلانات...اعلان عن الدلع مثلا
واتارى ايه بقى ياجماعة بعد الهم ده كله.....الراجل طلع بيهزر
وكان نفسه بس يضحكنى
ولما حس انه ضحكنى كفاية..قفل
:Dاكيد ربنا هيجازيه خير على جرعة الفرفشة اللى بيوزعها على خلقالله
بس نسيت انصحه يعمم نشاطه الخيري...بالدلع...ومايخليهوش محصور بس على البنات اللى شاف صورهم..ومايشترطش وجود صورة فى حالة مماثلة
ربنا يقرفك
ـــــــــــــــــــــــ
واحد تانى من محبي الاعمال الخيرية....بيرشيني
يعلق تعليق مثلا...ويجي يقلى عجبك؟؟طب وريني صورتك
يقلى ياااه ده انتى بتكتبي حلو اوى..طب وريني صورك
انتى كمان من الزقازيق....طب والله بتوع الزقازيق مبدعين اوى...وريني صورتك كده؟؟
وفى الاخر اتفضل وقفل فى وشي الماسنجر
"ولم يظهر منذ ذلك اليوم"
وعلى فكرة عمو ده تقريبا ادى مرتين..موكوس
ـــــــــــــــــــــــ
فى واحد تالت بيعاقبنى
وقالى بصراحة عندما جرح مشاعرى انه هيتخلى عن صداقتى وهيعملى بلوك...علشان مرضيتش اوريله صورتى
رغم انها صورة عادية
اصله بيكره المنقبات...وبيحس ان البنات اللى مابيعرضوش صورهم زى المنقبات
"على حسب تعبيره"هتخبو ايه ياحسرة
طبعا انا اتدمرت نفسيا بعد الموقف الاليم الكليم ده...وعرضونى على اكتر من طبيب نفسي فى جميع انحاء المعمورة علشان اتجاوز المحنة اللى حطنى فيها بسلامته
"واحب اوجهله رسالة من موقعى هذا"جتك نيلة يافندم
ــــــــــــــــــــــــــ
غير بقى اللى تلاقيه بيتعامل بمنتهى الرفرفة الانسانية....وهو برة قرد مثلا
واللى بيطلب رقم التليفون بمنتهى الخجل ..لدرجة ان الواحدة ساعات بتحس انها نفسها تديله الرقم تطوعا
واللى مثلا يجرب مرة....ويبعت صحابه ياخدو حظهم من التجربة السعيدة...تلاقى كده حوالى 6 ايميلات عاملينلك ادد فجأة وكلهم بأسم
مثلا MEDO LOVE
ـــــــــــــــــــــــــــ
انا بكره النصب بصراحة...وده نصب...وبكره اوى الغباء....ومافيش اغبي من كده
وبكره كمان اللى فاكرين نفسهم حاجة....وبكره الستاير برده
وفى الاخر تلاقيهم عاملينلك حملة زى اللى على الفيس بوك مثلا بتاعة لسة فيكي رجالة يامصر....وتدخل على الجروب ميمبرز تلاقى مين بقى
كل الاشكال العقيمة دى....واللى حاططلك بادج فى البلوج بتاعه...واللى كاتبلك اية دينية....
بجد بجد مش عارفة انتو طايقين نفسكو ازاى

Friday, August 1, 2008

مساحة للكتابة...ممكن تبقي اغلى من اى حاجة..فى لحظة من االلحظات
انا شخصيا بقدّر الورق...وبحتفظ بجميع اوراقى
وبحب دايما الفرص الجديدة..زى حبى للمساحات البيضا او المسطرة...وحبى للنقش اللى بتحكم فيه غالبا...وبحتفظ بيه مع باقى المحفوظات فى النهاية
مساحات الكتابة زى مساحات الارض..زى حتة القماش الجديدة....زى بداية السنة...زى ده كله
as you like
ودى اجمل حاجة فيهم...البداية..والبداية...والبداية...وفكرة البداية...
الناس عندها مواهب كتير ...وفى ناس عندها موهبة زى المقاوحة....تبقي عنيدة عمال على بطال...وناس عنها موهبة الوهم....بتعيش نفسها فى الوهم...وبتحرص دايما على وجود وهم متاح ليها..تعيش فيه..حتى وهى عارفة كويس ان باقى الناس فقساها
وناس تانية عندها موهبة زى الاسقاط....وتكمل
وناس عندها موهبة زى موهبة البداية
ودى على فكرة مش حاجة مخيفة
بس لازم تكون بداية بعد نهاية..مش نفتعل النهاية علشان نبدأ
مش مخيف انك تقابل حد عنده القدرة انه ينهى اللى فات علشان يقدر يبدأ
ومش مخيف انك تقابل حد عنده الاصرار على ده
ومش مخيف برده انك تقابل حد قادر دايما يبدأ
لو مخيف من ناحية...مطمئن من ناحية تانية
على فكرة فى نظرى فرق بين الموهبة والهواية
انا اقصد كل الحاجات اللى فوق دى مواهب وليست هوايات
المشكلة بجد..ان البداية دى تكون ستارة...او لون اسود بيدلق على اللوحة علشان يغطى ملامحها....مجرد بدل..او كوفر
وليس حاجة فى حد ذاتها
انا مبحبش البدايات اللى من النوع ده
هى شرعية عند البعض..لكن عندى محرمة
عمرى مامسحت ورقة علشان ارسم لوحة مكانها
وعمرى مارسمت حاجة عاجبانى بجد..على ورقة قديمة
ــــــــــــــــــــــــــــ
الكلام ده كله لو حد بيتعامل بمبدأ اساسه..صدق مع النفس...ودى المشكلة الكبيرة جدا..واللى هتعمل نقطة الخلاف
كلنا شايفين نفسنا بنتعامل بصدق..بس مش كلنا بيسرع لأيجاد المبررات لنفسه علشان يثبت فى الاخر انه بيتعامل بصدق
وهنا ممكن تفرق
وبرده ده مش المقياس
ومافيش مقياس
بس اكيد كل حد فينا عنده حاجة من جوة تقله انت غلط او صح...من غير مايفكر فى غلط او صح من وجهة نظر مين...مجرد غلط او صح....او مستريح ومش مستريح مثلا
واكيد برده كلنا بنقدر نميز الاوقات اللى بنخلى ضميرنا ميت فيها...والاوقات اللى بينقح علينا
ويمكن ده فى حد ذاته دليل على وجود الضمير
علشان كده الانسان الصادق ابو ضمير مميز اوى عند الناس وبيحترم...وبيتحب ..حتى لو فى السر
ـــــــــــــــــــــ
فى الاخر بجد مافيش زى التجربة...والمقارنة....والقياس....وبعض المغامرة
دى الطريقة الويحدة الاقل عجزا فى الاكتشاف
ومقابل حبة العجز اللى فيها..مفروض نسيب عندنا مساحة للتسامح فيما مضي...تكفى للقدر من التجارب اللى يخليك تقدر تحكم فعلا
مع النفس ومع الغير
ومانزودش اوى فى موضوع المساحة..علشان هتاكل اكيد من مساحة حاجات تانية اهم فى المستقبل او الحالى
اهم بكتير
ــــــــــــــــــــــ
بس خلاص