اد ايش..كان فى ناس
دى اغنية لفيروز..مش عايزة اكتب كلماتها علشان مش حافظاها
ممكن اقول كلام كئيب جدا يقرف اى حد بيقرالى بأستمرار...هيلاحظ نوعية الكلام نفسها مملة
وممكن اسرح بخيالى وارسم صورة جميلة لصورة جميلة تانية مفروض الناس تتخيلها رغم انها مش حقيقية


معرفتش اقول ولا كلمة...كل الفكرة اللى كانت مسيطرة على دماغى ساعتها
ان انا بكره البلد دى
لدرجة تكرهنى فى اى شئ يقترب للصفة المصراوية


تخيلو بقى الحالة اللى تخلى حد كل هروبه...للى بيهرب منه
وايه السبل اللى قدامه...وايه الاحتمالات اللى ممكن تكون...

والحكمة ايه من الوشوش الكتيرة اللى بنفتكرها...والوشوش الكتيرة اللى نفسنا نفتكرها ومش قادرين
ايه الحكمة؟

كان فى مكان بقضي وقت طويل فيه....بحبه...المكان ده اتهد دلوقتى..واتبنى مكانه حاجات تانية مالهاش اى صلة بطبيعة المكان الاولانى
وكل اللى دليل على وجوده حبة الصور الصغيرة اللى كانو ملزوقين على بابه الازاز...حتى ريحة البارفان اللى كانت فى الشريط الهدية..اختفت
انا بدأت اشك فى وجوده من البداية

ياه ياجماعة

ياه بجد...نفسي اقول ياه كتير اوى

اولا من البرد اللى عندى

او التعب او الانفلونزا المملة

احساس مش ظريف ابدا انك يجيلك رغبة فى النوم وماتقدرش تنام علشان ماتتخنقش وتفطس...فى حين ان باقى الايام اللى من غير تعب...مابتقدرش تنام بسبب الارق

يعنى دلوقتى انا عايزة انام من التعب ومش قادرة بسبب حاجة غير الدلع

ربنا يقرف

ــــــــ

الياه التانية بقى..برده على التعب

البرد مش بس بيعمل عطس فى المناخير ودوخة وبيبهدل الاحبال الصوتية
ويخليك تتكلم زى الاسد..ومناخيرك زى الحيوان اللى بيشفط النمل..ولا عينك زى الباندا
فقط

بيعمل تعب غريب فى الغدد اللى على الخدود..وبيعمل تعب فى اللوز حتى لو كنت شايلها

وبيعمل تعب فى العضم...اللى قررت اخيرا اشيله واركب بداله بقسماط بالسمسم

ربنا يقرف برده

ـــــــ

الحالة التالتة

افتكرت احساس

هو مش حنين

نفس احساسك لما تشوف فيلم لتانى مرة...وانت مش متأكد انك شفته قبل كده

انا بتفرج على الفيلمين لتانى مرة

مرة اتعمل فى دماغى وشكيت..واديه بيتحقق بالحرف

بالحرف

والتانى...بيقلد الاولانى...بس الفرق ان انا شفته قبل كده فمش هتفاجئ كتير

بس مقدرش امنع نفسي..بين كل لحظة يعلى فيها التون..ان انا اقول ياااه

ياه فعلا

ـــــــ

كنت معتقدة بفترة طويلة ان الحب حاجة جميلة...وده ماتغيرش

كنت معتقدة ان انا اقدر اتحكم فى مشاعرى..وده اتغير نسبيا

وكنت معتقدة ان انا مقدرش اعيش من غير ناس معينة..وده اتغير كتير

وكنت معتقدة برده ان الوقت تأثيره...مش ممكن يأثر فيا...وده الى اتغير تماما

الوقت بيأثر فيا

واقدر اعيش من غير حد

ومش كل الوقت بتحكم فى مشاعرى...حتى لو فى النهاية بتحكم فى الموضوع كله

ولسة الحب فى نظرى حاجة جميلة

ـــــــ

OOOOOOOOOOF

3ATSHOOOOOOOOOOO

OFFFFFFFFF AGAIN

& 3333333333AAAAAAAAAAAAA

ربنا يشفيني بقى

..

فى دايرة الرحلة..تدور بينا..تخلا...اه ياحبيب عمرى..وصحبتى وقمرى
دى اغنية لمحمد منير..كنت بسمعها وانا فى تانية ثانوى..اكتر حاجة عجبتنى فيها الايقاع بتاعها...كانت اغنية شجية
مش عارفة يعنى ايه شجية بس حاسة انها مفروض تتكتب هنا
ــــــ
فى اغنية تانية اسمها
mandy
هى اغنية اتغنت من كذا حد...انا سمعتها من راجل قديم..وفرقة ويسيت لايف غنتها بعد كده بس القديمة احلى
دى كلماتها

i remember all my life
raining down as cold as ice
shadows of a man
a face through a window
crying in the night
the night goes into
morning just another day
happy people pass my way
looking in their eyes
I see a memory
I never realized
how happy you made me

oh mandy
when you came and you gave without taking
but I sent you away
oh mandy
when you kissed me
and stopped me
from shaking
and I need you today

oh mandy
Im standing on the edge of time
I walked away when love was mine
caught up in a world
uphill climbing tears
are on my mind
and nothing is rhyming

oh mandy
when you came and you gave without taking
but I sent you away
oh mandy
when you kissed me and stopped me from shaking
and I need you today
oh mandy

yesterdays a dream
I faced in the morning
crying on the breeze
the pain is calling

oh mandy
when you came and you gave without taking
but I sent you away
oh mandywhen you kissed me and stopped me from shaking
and I need youuuuuuuuuuuuuuuu
ـــــ
انا بحب الاغنية دى اوى...اول مرة سمعتها كانت مسجلة...وفيها صوت صدى ..سوء تسجيل بس بصراحة عمل ايفيكت عالى اوى
كنت فوق السطح نايمة على الارض مع اختى وبتعلمنى اماكن النجوم...الدب الاكبر..وكاسيوبيّا...والنجم القطبي..
كنا فى الصيف..وكان فى هوا...ايام ماكان فى الصيف هوا
بالليل طبعا
وانا كنت لسة فى المرحلة الاعدادية..يادوب 11 او 12 سنة
ــــ
ليا ذكريات كتير بالاغانى...فى اغانى مش مميزة اوى بس بحبها جدا....ومعظم الناس ليهم اغنية عندى
فى ناس بفتكرها فى اغنية...وناس بغنى علشان افتكرها
وناس موجودة فى كل الاغانى
And I miss you - like the deserts miss the rain
تقريبا الاغنية دى..ماسمعتهاش كاملة ولا مرة
ومش عايزة اسمعها كاملة
الجزء اللى كتبته منها كفاية..وفيه كل ذكرياتى الممكنة
ــــ
فى اغنية تانية برده اسمها
If I Ever Fall In Love Again
ده الجزء اللى فاكراه كويس اوى
And if I ever
(ever fall)
In love (again)
again
I will be sure that the lady is a friend
And if I ever
(ever fall)
In love (so true)
so trueI will be sure that the lady's just like you

الاغنية دويتو..والكلمات المعادة بين القوسين بتتقال زى صدى..من الحد التانى
ـــــ
الاغنية اللى بجد بجد بحبها
اوى
وبسمعها بكل جزء فيها..كل الالات بتاعتها...وكنت حريصة ان انا ابوظ سماعة الام بي ثري علشان اسمع الموسيقي الخلفية بس فى السماعة اللى باقية
اغنية
seal
Kiss From A Rose
ودى مقتطفات من الليركس بتاعتها
You became the light on the dark side of me
..
There is so much a man can tell you,So much he can say.
You remain,My power, my pleasure, my pain,
..
Now that your rose is in bloom,A light hits the gloom
on the grave.
ـــــ
على فكرة..الاغانى دى كلها قديمة نوعا ما

نفسي حد يفتكرنى بأغنية....بجد نفسي
ويعلم على الاوقات بالاغانى...الاوقات بتاعتى فى حياته
دى حاجة انا بعملها علشان نوعا ما ذاكرتى موسيقية اكتر...فبعلم السنين بالالبومات...وبالاغانى المميزة
طبعا دلوقتى يادوب بحرص ان كل حد مميز ..احتفظ منه بأغنية
وبسيب باقى ايام السنة وباقى الاشخاص يضيعو من ذاكرتى

ـــــ
فى الاخر فى اغنية لمادوننا
بتفكرنى بأختى لما كنت بتفرج خلسة على مذكراتها
واتعلم منها
وبتفكرنى بنفسي ساعات
الاغنية اسمها
you must love me


وده الجزء اللى كان مكتوب فى المذكرات..واللى عرفته
Deep in my heart I'm concealing
Things that I'm longing to say
Scared to confess what I'm feeling
Frightened you'll slip away
you must love me



ــــــــــــــ
نكمل بعدين

الحمدلله من قبل و من بعد

بسم الله الرحمن الرحيم ..





أحبائي ، السلام عليكم و رحمة الله و بركاته

امبارح كان بابا بيكملني عشان يحاول يفهم بنته -أنا- فيها ايه؟؟

لأني بقيت بازعق و باتضايق بسرعة أوي .. و دة على غير العادة..أنا لما باتضايق صوتي مش بيعلا و بحاول اوي اني ماغلطش..

بس نظراً للشكاوى المتكررة مني في البيت من كل الناس تقريباً ..

بابا كان لازم يعرف.. فيا ايه ؟؟

المهم توصلت معه لاتفاق رائع ايه هو بقى ؟؟

ان لما حالتي تسمح بالحديث .. احتمال اتكلم .. بس حاليا .. مش هقدر اقول حاجة ..

بابا و ماما خايفين عليا من الكتابة .. ماما بتقولي انا خايفة عليكي تتجنني .. انتي بتكتبي طول الوقت ، و بابا خايف ييجيلي فصام ( الفصام انفصال عن الواقع عشان في ناس جهلة كتير مفكرين الفصام هو ازدواج الشخصية )

فاتفقت معاهم اني مش هكتب مؤقتاً ..

عشان يطمنوا همة بس اني مش ناوية على فصام و لا هذيان و لا هلاوس سمعية و بصرية :)

عندي حاجات كتبتها قديمة شوية ..

هابقى انشرها في مدونتي قهوة بالفانيليا

عشان مابقاش بعدت عن الكتابة ظاهرياً حتى قدام نفسي ..

امبارح سمعت خبرين حلوين جدا جدا جدا ..

أول خبر : سمر حبيبتي .. نجحت .. و فاضل لها خطوات بسيطة جداً.. و تحقق جزء من أحلامها .. ربنا يوفقك يا سمر

تاني خبر : علي الغلبان .. زميل دراستي .. علي دة كان مظلوم طوول الوقت .. و كان صعبان على الدنيا كلها ، امبارح خطب أكتر واحدة بيحبها في الدنيا .. ربنا يتمم لهم بخير ..

الخبرين دول خلوني اسجد لله شكراً على نعمه و فضله عليا و على الناس اللي بحبهم

منورين و الله :)

سلام بقى ..

الكلام عقيم اوى....بيقف عند حدود كتير اوى....مابيقدرش يشرح كل حاجة...ولا بيوصل كل اللى بنحتاجه

ساعات ممكن تعمل حوار مع حد من غير كلام...الكلام بيكون مختصر وقليل...علشان فى لغة تانية بينكو

وفى ناس كتير بتطلع عينك شرح...ولا هما هنا

الكلام عقيم اوى....مابيقدرش ابدا يوصل لأبعد حتة...ولا لأقرب حد...ولا لأضلم مكان...ومابيقدرش برده يعدّل حاجة اوى...او يوضح حاجة اوى...او ينسق حاجة اوى

دايما فيه ميسسنج بارت...ودايما فى كلمة..فهمتنى غلط....او..مقصدش ده

ودايما فى كلمة ماتقالتش

ساعات بنكون حكيمين بالفطرة...مانقلش اللى ماينفعش يتقال

وساعات بنكون احمقين بالفطرة برده...وبنخبي تقريبا كل اللى مفروض يتقال

الكلام عاجز اوى...بعد كل اللى بيتكتب..لسة فى كلمة ناقصة

ناقصة بقصد..او ناقصة علشان متعملتش لسة

:)

الكلام فعلا عقيم

وكلامى ده دليل

فهمتو حاجة؟

i don't think so

mosh mohem..:)

فى عز الاوقات الصعبة..ممكن تعرف انت مين..ليك

دى اللحظة الوحيدة اللى بتعكس فيها المراية صورتك الحقيقية..

وتظهر حجمك الحقيقي...وممكن كمان تكتب تمنك تحت

مافيش نتايج بناخدها اكتر من كده..ومافيش نقطة مناسبة تنتهى عندها زى النقطة دى

نقطة تعريفك عند معظمهم...ونقطة تعريفاتهم الجديدة عندك

مراحل الفقدان الخمسة

بسم الله الرحمن الرحيم

النهادة عاوزة أتكلم في موضوع مهم جدا جدا .. كنت وعدت سمر و ولاء إني هتكلم عنه هنا ..

ولاء المرة اللي فاتت كانت بتقول ان الأمل ساعات بيتحول لوحش و لازم نقضي عليه بسرعة عشان نقدر نواصل حياتنا بشكل طبيعي ، هتكلم عن الفقدان ، المرحلة اللي بتحصل بعد صدمة قطع الأمل ، مما ينتج عنه فراق ، الفراق ممكن يكون بأي وسيلة ، زي الموت او الظروف أو السفر ، أو ما شابه ، و المراحل دي إدراكنا ليها بيساعدنا على تجاوزها ، عشان حتى نبقى فاهمين نفسنا كويس

كمان بتصاحب المراحل الخمسة أعراض الانسحاب الناتجة عن التعود ، زي الصداع و اضطرابات النوم و الشهية ، و الدوخة أحياناً



المرحلة الأولى : العزل و الإنكار -

Denial and Isolation.

في المرحلة دي ، هنبتدي نحس بالإنكار، هننكر الحدث في ذاته ، زي مثلاً لما نقول إن دة ماحصلش أو إن دة مش ممكن يحصل أبداً.. ساعات كتير في ناس بيتعدوا المرحلة بتاعت الانكار دي بتكذيب الذات لتفادي الألم فلا يبدو عليهم الحزن أبداً ، هي مرحلة تحتوي على نوع من الذهول

و في ناس تانية الإنكار بيتحول عندهم لنوع من العزلة ، بينسحبوا من أنشطتهم العادية و اليومية و بيميلوا للوحدة جداً و المرحلة دي ممكن تقعد لحظات ، و ممكن تاخد وقت طويل جداً



المرحلة الثانية : الغضب
Anger

في المرحلة دي ، بنبتدي نحس بالغضب ناحية الشخص اللي فارقنا ، حتى لو كان ميت مثلاً نتيجة للشعور بالجرح الشديد الناتج عن الفقدان ، و بيلوم الطرف الآخر جداً على عدم نجاح العلاقة أو على عدم استمرارها ، حتى لو كان في الواقع مفيش حاجة ممكن تخلي العلاقة تستمر ، أو لو كان سبب لا يمكن منعه ، زي الموت أو المرض

_____________

المرحلة الثالثة : المساومة - الشوق و الحنين

Bargaining

في المرحلة دي ، بنبدأ نحس إن الفراق حدث بالفعل ، و بعدين بنبتدي نعمل مساومة ، يعني مثلاً ، نحاول العودة إلى الآخر بأي شكل ، في الحالة دي بالنسبة للفراق الناتج عن العلاقة العاطفية مثلاً ، عشان نتخطاها لازم نتخلص من كل وسائل الاتصال بالطرف الآخر ، يعني كل ما قد يجعلنا نتصل به بشكل مباشر ، يجب التخلص منه ، عشان نتعداها ، في المرحلة دي بيزيد الشوق جداً إلى الوضع القديم بدرجة يصعب تحملها أحياناً كثيرة.

__________

المرحلة الرابعة :الإحباط أو الاكتئاب

Depression.

بنمر بمرحلة اكتئاب ، و درجة الاكتئاب بتختلف باختلاف الاحساس بالفقد و الفراغ ، بيصاحب المرحلة دي أعراض الاكتئاب العروفة زي مثلاً

شعور بعدم السعادة والتعاسة وانخفاض الهمة والحزن الذي لا يذهب ويكون الشعور أسوأ في فترات معينة من اليوم وعادة تكون في الصباح الباكر

1- عدم القدرة على الاستمتاع بأي شيء

2 -عدم القدرة على التركيز الجيد

3- الشعور بالذنب نحو أشياء لم يكن بيدك شيء عمله لها

4- تصبح متشائما

5- تبدأ في الشعور باليأس وربما تشعر بالرغبة في الانتحار Suicide "انتحاري".

6- أداء أقل في العمل

7- هدوء شديد فوق العادة و لا رغبة في الكلام على الإطلاق

8 - سريع الغضب على غير العادة و قليل الاحتمال

9- شكوى من مشاكل جسدية غير واضحة

10 -عدم الاهتمام بالمظهر بشكل لائق

___________

المرحلة الخامسة : التقبل

Acceptance

بعد ما بتنتهي مرحلة الاكتئاب و اللي القدرة على تعديها بتختلف من شخص لآخر ، بتبدأ مرحلة التقبل ، تقبل الحدث .

الجهد في تعدي الاكتئاب ضروري جداً و قد نحتاج إلى مساعدة طبية مختصة لتعدي مرحلة الاكتئاب و لبعض الأدوية المضادة للاكتئاب

و طريةق تعدي الاكتئاب بتختلف من شخص لآخر ، لكن يجب أن تكون لديه الرغبة في تخطيه و هي أول مستلزمات العلاج ..

المصادر الطبية :

Memorial Hospital

Medicine Net

Maganin

كل الاوقات بتلف فى دايرة...دايرة ..كلنا بنلف فيها مع الاوقات

وقت العصر مثلا على سبيل المثال..اقدر اقولكو 100 موقف حصل.. على مدار العمر اللى عدى...لو صورتهم بكاميرا وحطيهم كلهم فى صورة واحدة..مش هتحس بأختلاف الزمن..غير بس فى المبانى..وحبة الكراميش اللى على الوش

يعنى ده تأثير الزمن الوحيد؟؟

كل ماتمشي فى الدايرة؟كل ماوشك بس يختلف؟؟والمبنى اللى وراك يبقي اصفر اكتر

ياااااه..نظرة فى منتهى التفاؤل

طيب لو مسكنا الفترة اللى حصل فيها ال 100 موقف بتوع العصر مثلا..

هنلاقى بلاوى حصلت..بس مش هتقدر تتكلم عن اكتر من 5 مثلا

ودى ميزة النسيان...وعلشان كده بعتبر نفسي محظوظة

ــــــــــ

اكبر جزء بيتغير فينا..مش معروف لسة...واكبر تأثير معروف لينا...هو تأثير التغير فى الجزء ده...

!!يبقي ايه بقى؟؟

ــــــــــ

لو رجعنا تانى للدايرة اياها اللى ماشيين فيها....هنلاقى رفقاء للرحلة...ناس بتلف معانا..وناس بتلف بعدينا..وناس بتلف قبلينا..."وناس بتتعب شوية لغاية لما نحصلّها"..علشان كده بنتقابل

وناس عمرنا ماهنتقابل معاها..

حتى لو كنا طول رحلة عمرنا..شايفينهم..قدامنا بكام خطوة بس

ــــــــــ

مكان زى المطار..شاف كام موقف؟؟..واتلف عليه في كام دايرة؟؟

صدى الصوت..اتحط فى كام تأثير؟؟؟..اتسمع فى كام حلم؟؟...وشارك فى كام موقف؟؟

ولا ده اتغير..ولا ده اتغير

العدسة بس اللى بتتغير...ونظرة المشاهد

اللى هو فى الحالة دى مخنا الكريم

ــــــــــ

انا دلوقتى اكتر حد حاسس بالدوخة من اللف...واكتر حد مش قادر يوصل للى قدامه...ولا قادر يستنى اللى وراه...ولا قادر يتصاحب على اللى بيلفو معاه فى نفس المستوى

وبرده اكتر حد مش عارف هما مين..ومش فارق معاه...ومش مصدق

ولسة عندى استعداد اكمل الدايرة للأخر..علشان اجى فى نفس الوقت ده اللفة الجية..وافتكر كلامى دلوقتى..او اكتب شبيهه....او افكر فى نفس الفكرة

وده اللي مخوفنى

تقريبا بقيت عارفة السيناريو

عارفة ايه اللى هيحصل...ونفسي بجد اكون غلطانة...

ــــــــ

الحاجة اللى بتخلينا نحس انه يوم جديد..هى نفسها الحاجة اللى بتخلينا نحس انه خلاص..كل حاجة انتهت

احساسنا بالشئ

تقدر تحسس نفسك ان كل يوم مختلف تماما

وتقدر برده تشوف الرتوش الخارجية..وتحس انه زى اى يوم

بس منين بقي نزود الابيليتي..ان احنا نحس اكتر

او نحس اقل

حسب اللى احنا محتاجينه فعلا؟؟

معرفش

ــــــــ

ــــ

وجع قلب .. انتظار

أجمل حاجة فيك .. اني طول عمري مستنياك تيجي ..

ساعات كتير باندم أوي ان حد فينا اتأخر على التاني ..

مش ممكن أكون مستنياك طول الوقت دة عشان ماتجيش انت في الاخر

عارفة اني مش مثالية أوي .. و عارفة انك فرصتي الوحيدة الحقيقية اللي هتخليني أعيش أنا .. زي ما المفروض أبقى أنا

مش عاوزة أعيش حياة حد تاني غيري ..

و لا عاوزة أكون حد تاني غيري ..

المسافة يا ترى . .بتكبر و لا بتقل ..؟؟

النهاردة واحدة قالت لي .. إن الأمل أحياناً بيتوحل لوحش .. لازم نقضي عليه بسرعة .. عشان نقدر نواصل حياتنا بشكل واقعي ..

صحيح الكلام دة ؟؟

معقولة الأمل يتحول لوحش ؟؟

و معقولة ماتجيش في ميعادك ؟؟

و معقولة افضل لوحدي من غيرك ؟؟

طيب .. يا ترى ممكن تطلع برة قلبي و روحي الاول .. و بعدين نبقى نشوف الموضوع دة ؟؟

المرة دي .. أكبر من أي حاجة كتبتها أو قلتها ..

لسة كل الكلام جوايا .. و لسة الوقت ماجاش .. و لسة محدش عارف .. و لسة حاجات كتير

و لسة حاسة بإن جوايا نار .. و حاسة اني في حبل حوالين رقبتي .. بيضيق ببطء .. لحد ما في مرة هموت و هتخنق ..

طيب حتى لو هموت ..

معقولة تسيبني اموت لوحدي ؟؟

كتير أوي ببكي و محدش بيحس بيا .. و لا بيشوف دموعي ..

ساعات بابكي لحد ما انام من كتر الوجع اللي جوايا ..

بيغمى عليا مش بانام ..

باصحى الصبح بصداع فظيع ..

دايماً خايفة من و بعدين ..

أنا محتاجة لك فعلاً .. تعالى خدني بقى!!

كل قيمة بنعملها لحد..مش شرط تبقي قيمته الفعلية..هو مجرد احساس بتقل الحد ده او بوزنه
زى حد ضعيف..لو خليته يشيل 10 كيلو هيحس انها حاجة ضخمة جدا...ولو جبت حد اقوى شوية مش هيحس بنفس الضخامة
ساعات احنا كمان مابنحسش بحجمنا الحقيقي الا لو اتحطينا فى تجربة...مقارنة
يعنى انا مبقدرش انا ضعيفة ولا لا الا لو دخلت فى مقارنة مع حد اضعف او اقوى..او حد حتى اقدر اتغلب عليه..بغض النظر عن حجمه
التجارب بتعلمنا احنا ايه...بتعلمنا النقص فين علشان نقويه..
وبتعلمنا برده ان القيم اللى بنفرضها للأشخاص مش شرط تبقي قيمتهم الحقيقية...ده مجرد نظرة مقارنة مع صورة قديمة..او مع صورة خيالية من احلامنا
ـــــــــ
يبقي احساس مؤلم اوى انك تشوف حد على حقيقته...القليلة...بعد ماكنت بتعتبره حاجة كبيرة جدا وقيمة
حاجة تزعل فعلا..انك تشوف الوحاشة ..وتشوف النقص..بعد ماكنت حاسس بحاجة عبقرية جدا
مابيكونش احساس وحش على نفسك اد ماهو احساس وحش ليها...يعنى زعلان ليها علشان اتصدمت فى الحد القيم ده
او زعلان عليه علشان طلع وحش اوى كده
وعلشان كده لازم يكون عندنا حتة مكان صغنن اوى...للأحتمال...فى عدم دقة قيمة الشخص ده الفعلية
ومكان زيه...واده...لقبول...اى نقص فى القيمة
ده لو الحد عايزين فعلا نكمل معاه ومقتنعين بيه
لكن لو الحد مش كده..يبقي نلغى المكان التانى
ـــــــــ
غالبا الاحساس الاولانى بيكون ليه قيمة كبيرة جدا من المحصلة النهائية
ولا مرة حسيت بحاجة ناحية حد من اول انطباع وطلع ظنى غلط..بس اللى بيبقي غلط بقى..هو ياترى انا هقبل ده ولا لا
اتعلمت فى الاول اكدب احساسي وادى للأشخاص فرصة...وده علمنى اصدق نفسي اكتر
بس طبعا ده مش حكم الاول والاخير واكيد لكل قاعدة شواذ
ــــــــــ
برجع تانى برده وبعيد صياغة الجملة الاولانية
مش كل قيمة لحد بنعملهاله..هى قيمته الحقيقية
ممكن قيمته تبقي اكبر بكتير من ده
وعلشان احنا قليلين..ماقدرناش نشوف منه غير الجزء الضئيل ده
ـــــــــ
من الاخر قدروا الناس..
القليل بحجمه
والكبير بحجمه
ومش بس على اساس حكمنا الشخصي
لازم نبقي فير..وناخد بالنا من كل الظواهر..ومانسمحش لمشاعرنا انها تأثر على حكمنا والا هنبقي عاطفيين وغير موضوعيين
ـــــــــ

نكمل بعدين

زىماقلت لشوشو هتكلم عن اعدادى هندسة
كانت سنة من الجنة بجد...
اول يوم ليا كالعادة مكنش اول يوم فى الدراسة..كان تقريبا التالت
اول محاضرة كانت محاضرة تفاضل..دكتورة سلوى بتاعة البرابولا
برابولا يعنى منحنى من الدرجة الثانية تمثيل للدوال اللى من الدرجة التانية زى اللى كنا بناخدها فى ثانوية عامة
المهم
كنت فى البنش قبل الاخير عمالة اكل شاى بالبسكوت..واهيس مع البنات..
ـــــــــــــــــــــــــــــــــ
مكنتش اعرف اسم حد..علشان كده كنت بطلع اسامى من نفسي..وغالبا كانت من نصيب الولاد
لدرجة انها بقت الاسم الحركى للحد ده فى شلة البنات...يعنى نقدر نتكلم عليه قدامه من غير مايعرف
:))
فوكس وكان اسمه كده علشان عينه عاملة زى التعلب..حكاكا.واسمه كده علشان كان ابيض وشعره احمر ..ابوللو.علشان محدش كان يعرف حاجة عنه وشعره واخد اتجاه فضائي شوية..سردينة..علشان كان تقريبا اكتر حد فاكر نفسه حلو...كابوكى.علشان عيونه مسحوبة.مها..علشان عيونه كبييرة اوى..شلولخ..شلولخ بقى..مافيش زيه يعنى..عز الرجال.هههههههه..كان اقصر منى وانا قصيرة..ومغرور..اونلى.يعنى اونلى هيم..مافيش زيه من النوع ده..ابو ضهر طويل.:).زتونة.ده اسم باباه.ستيكر..علشان كان صعب الازالة..بيلزق يعنى..
دول الولاد اللى فاكراهم
سبل له..علشان كانت بتسبل..بانيه..علشان مكنتش تعرف غيرها فى حياتها..كلت بانيه الصبح..هشترى بااانيه من ..الكافتيريا..شيكولاتة..:)..الحول العين..:)..ظيظي.دلع زينب.سوليت
دلع سالى
سلواعينا..علشان رفيعة اوى
دول البنات
سيشوار..الدكتور الى بيوقف شعره زى مارلين مونرو...صخر..الباشمهندس بتاع الرسم..برابولا.....شاعر...المرعب ..كان بيرعبنا بصوته...عاااااااااا اوبليتات
كانت بتلبس اوبليتات فى كتافها اعلى من مستوى راسها
دول اسماء الدكاترة والمعيدين طبعا احنا كناوقحين جدا واحنا عيال..وكنا بنترييق على خلق الله..بس والله ده مكنش هدف التسمية..
كان نوع من التعريف...وكمان هزار
لما دخلنا اولى ..وكل واحد دخل قسم مختلف...حسيت بحاجة وحشة اوى واكتئبت..خلاص مافيش صلة بينا تانى..ولا هنتقابل فى السكاشن ولا هنروح الورش
ولا هنتريق على بعض
:)احساس فعلا افتقدته
كل سنة بعد كده كان ليها طعمها وحلاوتها..بس اعدادى كانت سنة ماتتعوضش
بغض النظر عن شكلنا وقتها...او البهدلة اللى كنا فيها..كنا لسة عيال....حتى فى عز الامتحانات والامتحانات المملة وال14 مادة اللى ورانا..كنا بنطلع نضحك ونضرب بعض بالمساطر
بعد اولى حسيت بسنى..ان انا كبرت..واتطحنت...وخلاص هما سنتين تلاتة وابقي مهندسة...مش طالبة ولا عيلة هبلة
:)مبقيتش الحياة محاضرة نعد نبص لبعض فيها ونحكى اللى حصل امبارح
ولا بقت سكشن بنقضه تحت البنشات نتفرج على ميكب بعض ونلعب
ولا بقت 3 ساعات مملين نصبر عليهم ونتبسط اوى واحنا مروحين ..بقت اكبر من كده..بقت ضخمة فعلا...واد ماكنا بنحب بعض اوى ايامها..دلوقتى مافيش حاجة نعملها لو اتقابلنا غير نظرة...ساعات بنبخل بيها..علشان بس نثبت لنفسنا ان اعدادى خلصت..
رغم ان السنةدى كانت جميلة اوى...بس مبحبش افتكرها...مبحبش اشوف حد منها..قليلين اوى اللى نفسي فعلا اقابلهم صدفة كل فترة...
:)ده اثبات ليا من الحياة ان انا عشت اوقات جميلة اوى...
برجع بعد كل فترة..اشوف الحلو جنب الوحش..واميز الحاجات اللى بتلمع..فى وسط التوب الاسود...
مش كل حاجة وحشة..:)وفى وسط كل حاجة وحشة حاجة جميلة
ياريت اقدر اقنع كل الناس بكده..علشان مايزعلوش
:)
نكمل بعدين

موقف

انهاردة ركبنا تاكسي..الراجل اللى كان فيه قبلنا كان متدايق اوى انه مضطر ينزل من مكانه ورا علشان انا واختى نركب..هو نزل خالص ومشي بسرعة..بعد بصة قرف بسيطة
كان نازل محطة القاهرة اللى فى الزقازيق....احنا كملنا طريقنا مع التاكسي..سمعنا رنات صغيرة فى وسط موسيقي المولد اللى السواق كان مشغلها
اختى لقت موبايل..مبعجر نوكيا..معرفش نوعه..السواق رد
كان اخينا اللى نزل قرفان ومستعجل..ناسي موبايله:)
المهم السواق اتفق معاه..ينزلنا الاول...ويرجع يقابله فى مكان واضح ان صاحب الموبايل مش عارفه..بما انه مش من هنا اصلا..
كان ممكن اوى السواق يعدى على المكان ده واحنا معاه..بس هو قرر يلف لفة كبيرة علشان ينزلنا الاول قبل مايقابل صاحب الموبايل
طبعا دى حركة معجبتناش
المهم اخترعت حجة ان انا لازم لازم اشترى جرنان من الكشك اللى قدام المحطة..يعنى عند نفس المكان اللى هيتقابلو فيه...واختى طبعا فاهمانى بدأت تعمل معايا السيناريو
اف نسيت اجيب الجورنال
_يعنى مش مركزة..طيب هتجيبيه منين دلوقتى اكيد كلهم قفلو
لا اللى عند المحطة بتاع توزيع كبير اكيد فاتح..كنت بجيب منه المسائي
طبعا ده مش صحيح
يعنى هنرجع تانى
معلش انا اسفة ياعمو..عمو...
اعملك ايه يعنى ياابلة
هنكمل معاك للأخر معلش
:))
ضحكة رزالة
سواق التاكسي طبعا فاقس اللى بيحصل
قعد يقول ماينفعش اركن هناك هناخد مخالفة
بيحاول يقنعنى انزل بدرى شوية..:)بس على مين
المهم وصلنا للمكان..ندور على الراجل اللى ناسي موبايله...والناس زحمة رايحة وجية....لقيته
-انت اللى ناسي موبايلك
بص رقم التاكسي كذا...وكمان هو راكن فى الاتجاه ده..
وقفنا فى ركن..شفنا الراجل وهو راجع بالموبايل
وشفنا السواق وهو بيتحرره مخالفة
:))
بس روحت مبسوطة باللى عملته..واعتبرت ده نوع من كرم الضيافة لصاحب الموبايل الغريب
حتى لو كان شكى طلع على مافيش فى الاخر

وحشتوني جداً

صحابي..

وحشتوني جداً جداً ..

وحشتني بورسعيد ..

وحشتني شلتي الكبيرة ..

الاسبريسو في جيانولا مع موس الشيكولاتة

و الكلام الكتير .. عن لاكلية و الناس و المذاكرة و الوقت اللي بيضيع .. و الخوف من مشروع التخرج اللي ماعملناش فيه اي حاجة ..

............

زيزي ..

وحشتني جداً حالة الإحباط .. اللي كنا بنمر بيها سوا من الدراسة ، لما كنا بنطلع على طرح البحير و نشرب ميلك شيك شوكولاتة .. و نقعد نتكلم و الشارع هادي في الشتا .. و الجو بارد .. ماكانش بيبقى في زحمة .. مجرد انا و انتي و البرد و الحكايات .. ساعات كنا بنضحك من شدة اليأس بنسخر من حالنا و من حياتنا و بنقول لنفسنا و بعدين ..

و نقعد نعمل جداول مذاكرة .. و برضه نشيل نفس المواد ...

هههههههههههههههه

وحشتيني جداً...

..............

ريهام النحاس ..

وحشني أوي ادمان التفاح :)

فاكرة ادمان التفاح ؟؟

كنا بناكل تفاح بكميات فظيعة .. ايام مشروع التخرج انا و انتي ، فاكرة الرز بلبن ؟ و المهلبية ؟؟

فاكرة لما كنا نقعد في البلكونة نتكلم .. و نحكي .. و بعدين نلاقي الفجر طلع و احنا لسة مصليين العشا ؟؟ و ماحسيناش بالوقت ؟؟

وحشتيني أوي ....

...............

سماح أبورحاب..

انتي بقى بالذات .. ليكي عندي غلاوة كبيرة اوي اوي ..

فاكرة الساندوتش اللي ألفناه أنا و انتي ؟؟ فاكرة الحشري؟؟ و آليك بولدوين .. ونخاشوشو ؟؟

فاكرة ايام رمضان البرنس ؟؟ فاكرة الايس كريم في المعدية و الدنيا برد ؟

فاكرة لما كنت باتكعبل كتير و انا لابسة كعب و كنتي تضحكي عليا ؟؟

ههههههههههههه

فاكرة يوم ما وقعت و رحنا المستشفى ؟؟ وحشتيني بجد بجد بجد

...............

أم يوسف..

فاكرة الوصفية ؟؟

فاكرة اللي انا عملته ليلة امتحان الكيمياء لما كنا في اعدادي ؟؟

فاكرة العصيرفي موقف الاوتوبيس ؟؟

انتي بقى اكتر واحدة تعبت معايا و عرفت تقف جنبي .. فاكرة كنتي بتصحيني ازاي عشان اروح المحاضرات معاكي ؟؟

فاكرة محاضرات الصيفي ؟؟

و البوستر اللي في اوضتي ؟؟ اللي كان جنب سريري ؟؟

لو افتكرتي .. قوليلي انك افتكرتي .. وحشتيني .

...............

أبو آروى ..

فاكر الزبادو ؟؟

هههههههههههههههههه

فاكر لما ماكانش حد بيشرب زبادو البرتقال دة غيرنا ؟؟

فاكر اللوحة ؟؟ اللوحة اللي كانت نضيفة من تحت بس ؟؟

فاكر الطريق من المعدية لحد الكلية ؟؟

فاكر لما شرحت لكم البيزك ؟؟

و سافرت انا بعدها .. و بعدين قبل ما اسافر .. جبت لي زبادو عشان كنا في رمضان ؟؟

ربنا يوفقك يا ابو آروى .. و يبارك لك في أهلك و ولدك و مالك .

.................

أبو جنة ..

فاكر الصور الصغيرة ؟؟

فاكر كورس الكباري ؟؟

طيب فاكر كورس المساحة اللي في أولى ؟؟ فاكر لما المعيد سمى المجموعة دي مجموعة السيرك ؟؟

" إوعى إيدك "

" و الله يابني مانا شايف "

كنت حاقد عليا عشان امتحان الاستيل .. صح ؟؟

عشان انا تفوقت .. جبن فيه 56 من 100 و انت جبت 16 بس..

ههههههههههههههه

أبو جنة .. ربنا يوفقك و يبارك فيك

.................

الجدع ..

فاكر انتخابات الاتحاد ؟؟

فاكر ابو سمرة ؟؟

فاكر لما الدفعة بتاعتنا كلها فطرت في النادي في رمضان .. ؟؟

و لما قعدنا نلعب ..

فاكر كورس البيزك ؟؟ لما محمد خليل قال للمعيد نقسم البلد نصين .. انت رديت و قلت له ايه ؟؟

قلت له : " هو انت واقف في التجاري يا خليل "

فاكر لما قلت لك اني طالبة مثالية ..

قلت لي اه الطالبة المثالية اللي بترجع الساعة 12 بالليل .. عشان مش بتتأخر لحد 4 الصبح

هههههههههههههههه

...................

محمد خليل..

فاكر ايام المشروع ؟

لما كنت تنام جنب الشباك ؟؟

فاكر لما كنت ماسك ميزانية المشروع ؟؟

و عمرو كان بيقولك انت هتجوعنا خلاص .. مادام مسكت الميزانية نبقى هنجوع..

ههههههههههههههه

فاكر لما شريف صحاك من النوم في الكلية قلت له ايه ؟؟

لما قلت له : انت بتصحيني ليه ؟؟ هو انت مراتي ؟؟ مابحبش حد يصحيني

ههههههههههههه

أبو علي .. :)

ربنا يوفقك .

____________

الناس دي أجمل ناس عدت عليا في حياتي ..

و لو اقدر اعيد الزمن تاني ..

كنت هرجع تاني الوقت اللي كان بيجمعنا ..

حتى لو كان امتحان كباري او استراكشر .. :)

وحشتوني جداً..

ياسلام لما تكون مكتئب وتيجي بالزبط الغنوة الى ناقصاك..علشان تزبطك..وتنقلك من حالة الاكتئاب لحالة القرف الشديد

:)

:::::::

فى حد بيهرب منى..بيكرهنى فى الحقيقة..ومش قادر يمنع نفسه من متابعتى..ده بجد..ومش اعراض برانويا..بس دى الحقيقة

كتب عنى مرة وعرفت انها انا...وبيدخل كتير عندى.من غير مايتنازل عن جلالة سيادته ويقلى رأيه اللى انا عارفاه كويس

مابقاش يفرق معايا ابدا على فكرة..

you r nothing, my dear

وانا بالذات مش شايفاك زى مانت عايز...انا مبقدرش التقليد..ومبحبش الحمقى..المراهقين...ريح نفسك

.ربنا معاك

:::::::::::::::::::::::::::::::::::::::

صديقي الفلسطيني اخر مرة كلمنى قالى انه مش هيدخل تانى علشان اللى بيحصل فى غزة..ابن عمه استشهد وهو عايز كده...عايز يموت شهيد

مراته دخلت قريب بس خرجت بسرعة ملحقتش اعرف اخبارهم..بصراحة اعترف بتقصيري..وان انا فى اوقات معينة نسيته..ولما كنت بفتكره..مكنتش بيكون كفاية علشان اخد خطوة...مافيش خطوة اخدها..لا ايميل..ولا تليفون..بس كان ممكن ادعى

انهاردة بعتلى انه بخير...اتبسطت جدا..ربنا معاهم فى حياتهم..ويطلعهم من محنتهم بسرعة

::::::::::::::::::::::::::::::::::::::

عقلى الباطن ممل..بيحتفظ بكل حاجة ويرجع يفكرنى بيها فى احلامى...ياريت يبطل حركاته

كفاية زحمة اليوم..وقلة النوم

:::::::::::::::::::::::::::::::::::::

ابها....وحشتيني جدا...وحشتنى الرملة الرطبة..وريحة المطار...والمطر...وحشنى احساس الغربة الحقيقي...مش المزيف اللى عايشاه فى البلد دى..على الاقل بيكون عندك سبب مقنع لتغريبك...ابها..كل ذكرياتى عنك فيها اشجار..صنوبر وثرو...وفراشات بحجم كفى الصغير ايامها...وطريق فى جبال لفوق..وريحة ندى مستديمة..وبداية رحلة لمصر...او عودة لخميس مشيط

تقريبا اتعلمت فيكي يعنى ايه احساس بالحياة..اتعلمت مانساكيش

::::::::::::::::::::::::::::::::::

I look out for you

Come rain come shine

What good does it do?

I guess i'm a toy that is broken

I guess we're just older now

::::::::::::::::::::::::::::::

نكمل بعدين

note:

الصورة اللى فوق جميلة

جتلى رسالة دلوقتى بتفكرنى بأغينة بحبها

:)

فى سكوت زمانى يفوت لا انا ساقية ولا رحال

المعنى مش فى الاغنية..بس فى الفترة اللى كانت فيها

كانت فترة جميلة اوى...الناس الطيبة ..اللى فيها خير..بتبقي معرفتهم ممتعة وجميلة..

الصداقة كمان مابتطلبش قرب مكانى...ومابتتأثرش بالزمن..بس عايزة الاخلاص

انا بحب صحابي..:)

وشكرا لصاحب الرسالة الجميلة

ميمو